منتديات انفاس الحب - عرض مشاركة واحدة

آوسمتي · 31-07-2021

فوق الجبل
وارسلت للبعد شوفي
أقلب الأفكار بالكون واعجب

ذاك السهل
عيت تساهل ظروفي
واللي تعود صعب الأيام يصعب

عشق وغزل
يرسل معاني حروفي
واللي يبي روس المشاريف يتعب

غيمه وطل
والورد يلثم كفوفي
والطير مع حبات الأنسام يلعب

حلم كمل
كمل خيالي طيوفي
واللي معه لو ربع مافي يطرب

صقر نزل
ذا ماكره بالكهوف
مثلي يشاهد ما تطاير وما خب

شفت المثل
مشراف صقر عيوف
مازاحم الجرذي على الجحر والضب

وطير الحجل
حذر ويزحف زحوف
بين الحصى عن ناظر الصقر جنب

وهذا النحل
فوق الزواهر يطوف
يرعى من الورد الطبيبعي ويشرب

وريح حمل
سحاب مزن ينوف
لف الجبال وكل سافر تحجب

ركب وهل
وسل برقه سيوف
من حدرنا سيله سقى كل مشرب

ثم رحل
يرعد تزفه دفوف
في موكب صارت له الريح مركب

ثم فصل
شعاع شمس هنوف
تضحك له الغدران والطير والصب

وفز الأمل
واهتز قلب عطوف
يهوى بديع الصنع ويسبح الرب

الوقت زل
والشيب ما زاد خوفي
والشمس تغرب والرجا ما تغرب