السلام عليكم



قالها لي شايب ألماني طبعاً القصه عن نفسه ومن الواقع .
يقول كنت شاب واشتغل فالشرطه وراتبي زين .. يقول فكرت اتزوج واخترت البنت اللي اريدها وتزوجتها ومرت الايام والله رزقني منها بنت ، كبرت البنت وقلنا حان الوقت اللي نبني لنا بيت يضمنا نحن الثلاثه ..وننتقل من بيت الايجار ../-
يقول نحن هنا مش مثلكم ما نحتاج شركات ومقاولين .. يقول نحتاج مهندس يصمم لنا كل شي فالبيت
من الطابوق للكهرباء وناخذه ونعتمده ونوثقه فالبلديه ونبدا نبني
حسب المخطط مع وجود المهندس واشرافه
المهم يخبرني كيف تم البناء .. كانوا يجتمعون فاجازة الاسبوع مع اصدقاءه وربعهم ويبنون البيت وهكذا الى ان جهز ويعطيهم فلوس حسب كم ساعه اشتغلوا..، وعلى فكره عندهم الشاب الالماني يجيد جميع الاعمال لأنهم ينفقون على نفسهم الى ان ينتهون من الدراسه مثلاً النجار اولاده يشتغلون عنده براتب .. الخ
وطبعاً ما بتصدقون ان هذا البيت بُني بهذي الطريقه لأني قدرت ادخله بعد ما علمني كيف اصعد اي مكان عالي بدون تعب وهذه قصه ثانيه بقولها لكم مره ثانيه ..
البيت مبني على هضبه خضراء ... عباره عن قبو ودور راضي بعدين درج خارجي من الحجاره الطبيعيه وعلى يساره شجرتين تفاح لون الفاكهه احمر قاني يشهيك تاكله وهو فالشجر من حلاته .. وكان كل مره يخبي لي كم تفاحه هههه .. اعشق هالشايب ... المهم طلاء البيت من برا
ابيض من الجص مخلوط باللون الابيض
ومطعم بألواح الخشب من اجود انواعه ولما تصعد للدور الاول حوض من الحجاره مصفوف بطريقه رائعه ومزروع فيه انواع من الورود والصباريات ..
وطاوله من الحديد المشغول الاسود مع اربعة كراسي ...
وكان دايماً يرفض اني اخلي الشوز برا
ويقول عادي ادخلي فيه وانا ارفض
وداخل البيت غرفة جلوس صغيره على اليمين وحمام على اليسار
وكل اثاث البيت ابيض
ما عدا جلسة التلفزيون جلد بني ...وارضيات البيت لونها برتقالي غامق يلمع من جماله ونظافته ..
وحوالين البيت بلكونه تشوف فيها الجبال والبحيره والشمس ... الله على ذوقه وتفننه فاختيار اجزاء البيت
وفي مطبخ وفيه طاوله وجلسه على الجدار وهذي الجلسه تعتبر معلم تراثي لسكان الجبال .. وهذا المطبخ
فأي بيت الماني ما يسمحون لأحد يدخله ويشاركهم فيه وجبه او كوب قهوه او شاي الا لو كنت مقرب منهم
ويعتبرونك صديق وكلمة صديق حط تحتها الف خط لانهم ما يعطون هذي الكلمه لأي انسان ... حتى كوب ماي ما يقدمونه للغريب ولا يدخلونه بيتهم ... هذي الاشياء عرفتها من خلال وجودي معاهم
المهم انا استحيت اروح الطابق العلوي والبقيه راحوا ومدحوه لي
وكيف انه انسان مرتب بشده

بنكمل القصه
يقول بعد ما كبرت البنت شوي تغيرت عليّ الحرمه صارت تعيب على لبسي وشكلي وكيف اني دايماً برا
وفالشغل وما اهتم بنفسي ... وان طلعاتي للصيد اكثرت .. ومره تقول انت وقتك كله مع ربعك واحيان تقوله انت فلاااح .. يقول وانا صابر علشان البنت ... وفيوم رفعت قضية طلاق وتطلب نص البيت ونص ما املك ... هنا قضت عليّ وكان الموت اسهل لي من اني اسلمها بيتي اللي بنيته لبنه لبنه .. وشفته يكبر يوم بعد يوم .. وزينته برؤوس الوعول اللي كنت اصيدها وافتخر فيها ... ودارت بي الدنيا .. وهنا تخبرني جارته انهم شافوه ماسك بندقية الصيد بينتحر
فوقت اختفى عنهم وما عاد يطلع من البيت .. تقول جارنا الطبيب شافه من الزجاج وركض يخبرني ورحناله وحاولنا نكلمه ونواسيه .. وانه طز فكل شي الا صحتك وبنتك محتاجه لك .. قال حتى بنتي بتاخذها وانهار عليهم
واجتمعوا كل اصدقاءه واتفقوا انهم ابداً ما يطلعون عنه واحد ينام عنده والثاني يداوم .. الى ان هدت نفسيته شوي ويكمل لنا هو القصه يقول قالت لمحاميها انها بتبيع نص البيت اللي حكموا لها فيه والمسكين ما عنده فلوس يشتريه .. بس اصدقاءه اشاروا عليه انه يحط شرط للمشتري وهو انه لو عزّم انه يبيعه فيوم من الايام يكون هو الاحق فيه اولاً .. وفعلاً انكتب هذا الشرط فعقد المشتري الجديد .. ومرت الايام وكبرت البنت وتزوجت فالنمسا لان امها سكنت وتزوجت هناك .. بس البنت كانت تزوره وانجبت ليزا حفيدته ويحبها جداً تخيلوا الكالندر او الرزنامه كلها صورها وقالي فيوم انه بكتب هالبيت لها بعد وفاته ،،! والآن هو عندها يقضي اجازة الكريسماس عندهم ..~
المهم قبل سنه خبرني انه قام بتثمين البيت وعرف قيمة الدور الارضي وان المبلغ جاهز فالبنك من ما جمعه من مبلغ التقاعد بعد ما وصل الى سن التقاعد ترك العمل وبقيت هواية القنص للوعول مثل ما هي ..وتسلق الجبال ثاني هوايه عنده ههههه ولنا لقاء ثاني عن مغامراتنا معه فالجبال
وهذي قصة الشايب
شوفوا كيف كان ممكن يموت من الصدمه
وكيف هو وفاء الاصدقاء
وجارته اللي ما تركته فأزمته


ظبيه

المصدر: منتديات انفاس الحب

---

fr,g;l rwi 6

المصدر: منتديات انفاس الحب

---

fr,g;l rwi 6 fr,g;l

• ‏أحب أكون المنفرد بالوقت الأول والأخير
• رواية تسوين روحي