منتديات انفاس الحب - عرض مشاركة واحدة

آوسمتي · 05-01-2023

- قدرت تقنعك انها بتعاني من مشاكل نفسية و ادت الدور بجدارة في ( ونوس )
- قدرت تقنعك انها صديقة وفية و صاحبة صاحبتها في وقت الشدة في ( حلاوة الدنيا )
- قدرت تقنعك انها بنت بسيطة و طيبة عندها استعداد تضحي بأي حاجة عشان اخواتها و اهلها في ( امل حياتي )
- قدرت تقنعك انها قوية و شديدة قادرة تقف قصاد اي حد و تاخد حقها في ( بنت القبائل )
- حتي لما عملت دورها في ( هذا المساء ) قدرت تخلينا نحبها و نتعاطف معاها بالرغم من انها كانت عاملة دور زوجة تانية
- حنان مطاوع فنانة من العيار التقيل عمرها ما ركزت في موضوع البطولة و لا في مكان و ترتيب اسمها في العمل اذا كان في الاول ولا في الاخر ...
- حنان مطاوع عمرها ما اعتمدت علي الواسطة و لا استغلت تاريخ والدها و والدتها في شغلها زي ما فنانات كتير معندهومش ربع موهبتها و طلعوا بالواسطة و اخدو ادوار بطولة من اول عمل ..
- حنان مطاوع عمرها ما تاجرت بجسمها ولا شكلها ولا استايل لبسها عشان تلفت النظر و تبقي ترند فاشون
- حنان مطاوع فنانة موهوبة جدا ماشية بمبدأ الكيف مش الكم لدرجة انها كفيلة بمشهد واحد بس في العمل تسرق بيه الكاميرا من اي ممثل واقف قدامها .. لأنها ببساطة ممكن تعمل مشهد واحد تتقنه ويسيب علامة مع الناس و يفضلو فاكرينه لسنين طويلة احسن من مليون مشهد لبطلة تانية في مسلسل تاني بمجرد ما تشوفوه مرة واحدة و يعدي بعدها تنساه للابد و متفكرش تشوفوه تاني
- حنان مطاوع عارفة انه العبرة مش بالبطولات و لا بمكان الاسامي و ترتيبها .. العبرة بالاداء و الموهبة و العمل اللي يسيب علامة
- حنان مطاوع قادرة انها تمثل بعينيها في مشهد صامت من غير ما تتكلم وتتلون في اي دور بمنتهي السلاسة و تقنعك بيه جدا و تحبها فيه و ده لانها معجونة تمثيل بالجينات الوراثية ( الاب كرم مطاوع و الام سهير المرشدي )
الخلاصة : حنان مطاوع مش محتاجة تكون بطلة العمل عشان تظهر و تنور فيه لانها لو طلعت في لقطة واحدة او حتي ضيفة شرف هتبقي كفاية اوي عشان تعلم معانا ..